S Khabar

मिडिया हवका संचालक सँगै फेरी जुहारी चल्दै जिक्री र पाडेको !

नेपाली टेलिभिजनबाट प्रसारण हुने हास्य श्रङ्खलामध्ये लोकप्रिय श्रृङ्खला थियो, भद्रगोल । केही समयअघि ‘भद्रगोल’को टिम यो श्रृङ्खलाबाट बाहिरियो । पाँडे र जिग्रीको टोलीले नयाँ श्रृङ्खला ‘सक्किगोनी’ शुरु गर्‍यो । यो श्रृङ्खलामा पाँडे, जिग्री लगायत सबै कलाकार उस्तै भूमिकामा देखिए, जस्तो भूमिकामा ‘भद्रगोल’ मा देखिएका थिए । यसकारण श्रृङ्खलाले छोटो समयमै लोकप्रियता कमाएको छ ।

यता मिडिया हबका सञ्चालक सोमप्रसाद धिताल भने ‘भद्रगोल’ बाट छुट्टिएको टिमले हुबहु चरित्र उतारेको भन्दै प्रहरीमा उजुरी दिने तयारीमा छन् । ‘सक्किगोनी’ टिमले यो आफ्नो नितान्त अधिकार भएको, पहिले यस्तै सम्झौता भएको र ती पात्रलाई लोकप्रिय बनाउन आफूहरूले निकै मेहनत गरेको दाबी गरेका छन् । विवाद बढ्दै गएका बेला हामीले मिडिया हबका सञ्चालक सोमप्रसाद धिताललाई किन उजुरी दिनुभएको हो? भन्दै प्रश्न गरेका छौँ:

जिग्री पाण्डेमाथि उजुरी गर्नुभएको हो?

त्यस्तो होइन । उहाँहरूलाई हुबहु कपी नगरिदिनुस् न भनेर अनुरोध गरेका मात्र हौँ । भद्रगोलको विषय, भद्रगोलको कलाकार नै गएर उहाँहरुले उस्तै श्रृङ्खला निर्माण गर्नुभएको छ । अर्कै पात्र गरेर गरेको भए त हामीलाई के अप्ठेरो हुन्थ्यो र ! कलाकार हो, जहाँ जसरी जे गरे पनि भइहाल्यो । तर हुबहु सबै थोक मिल्ने गरी नगरिदिनुस् भन्ने अनुरोध मात्र हो ।

तर, सम्झौतामा त उहाँहरुको भूमिका उहाँहरुमा नै निहित रहने भन्ने सम्झौता रहेछ नि ?

हामीमा भनेको सम्झौताको अवधिभित्र उहाँहरुलाई दिएको हो । कन्टेन्ट कस्तो बनाउने भन्ने उहाँको अधिकार हो । भद्रगोल ब्राण्ड भयो । त्यो भित्रको अभिन्न अंग उहाँहरु हो नि ।

तर, प्रश्न के पनि उठेको छ भने हिजो धुर्मुस बनेका सीताराम कट्टेलले पनि त मिडिया हब छोडेपछि ‘धुर्मुस’ को क्यारेक्टरमा देखिनुभएकै छ त ?

कलाकारले कुनै कलाकारिता गर्नै नपाउने भन्ने होइन । जेपिटी क्रियशनले व्यावसायिक रुपमा नगरोस् भन्ने मात्र हो । कलाकारसँग जोडिएको विषयभन्दा पनि जेपिटी क्रियशनसँग जोडिएको विषय हो ।

तर, हल्ला कि, ‘सक्किगोनी’ ट्रेन्डिङमा परेपछि र एकाएक चर्चामा आएपछि उजुरी हाल्नुभयो रे नि?

होइन होइन । त्यो त के ठूलो कुरा भो । हामीले अहिले पनि भद्रगोल बनाउँदै जाँदा दुई वर्ष लाग्ला । भद्रगोल पनि पहिले ‘ट्रेन्डिङ’ मा थियो र? हाम्रो कुरा त के हो भने जस्ताको तस्तै पात्र, परिवेश, हाउभाउ, संवाद प्रयोग नगरिदिनुस् । हामीले पनि त ‘भद्रगोल’ मा लगानी गरेका छौँ त । अब उहाँहरु यसरी जानुभयो भने हामीलाई पनि यस्ता श्रृङ्खलामा लगानी गर्ने उत्प्रेरणा कहाँबाट आउँछ त?

तर, ‘सक्किगोनी’ का केही कलाकारले त मिडिया हबले पैसा दिएको छैन भन्नुहुन्छ नि?

पैसा नदिएको कुरै होइन । पैसा कति नै बाँकी होला । लिन आए भइहाल्यो त ।

उहाँहरुले त आफ्नो क्यारेक्टरलाई ‘बौद्धिक सम्पत्ति’ भनिरहनुभएको तर तपाईंले त…

हो, बौद्धिक सम्पत्ति उहाँहरुको पनि होला । तर लगानी त हाम्रो पनि छ नि । लगानीकर्ताको हिसाबले हाम्रो पनि मागदाबी रहन्छ । भोलि न्यायालयले जे निर्णय गर्छ । त्यही हुन्छ ।

तपाईंले उजुरी दर्ता गर्नुभएको छ हैन?

हामीले उजुरी दर्ता गरेका पनि छैनौँ । हामीले त कुरा गरौँ मात्र भनेका हौँ । तर, प्रक्रियामा छौँ । अब उजुरी दर्ता गर्छौं। हामीले त यस्तो भएको छ भनेर यस्तो बेलामा के गर्न सकिन्छ भनेर सल्लाह भएको छ । न्यायालयमा जाने हो तर कुन बाटोबाट जाने भनेर सल्लाह गर्न चाहिँ पुगेका हौँ । उहाँहरुले सल्लाह गर्न जाँदा उजुरी दिएको भन्नुभएको होला ।

तर अरु कलाकारले त कलाकार मारमा पर्नुहुँदैन भनेर आवाज उठाइरहनुभएको छ नि ?

मैले कसैलाई रोक लगाएको छु र? यसअघि पनि दीपकराज गिरी निस्किनुभयो, दीपाश्री निरौला निस्किनुभयो, जितु नेपाल, माग्ने बूढा पनि निस्किनुभयो । अरु कलाकार पनि निस्किनुभयो । मैले उहाँहरुलाई कहिले रोक लगाएको छु र? त्यस्तो पनि होइन ।

भनेपछि तपाईंको आग्रह हुबहु कपी नगिरिदिनुस् भन्ने मात्र हो?

हो । हुबहु नगरिदिनुस् । अलिअलि कपी गर्नु स्वभाविक हो । पूरै कपी नगरिदिनुस् भन्ने मात्र हो ।

अब के हुन्छ भन्ने लाग्छ तपाईंलाई?

थाहा छैन । यो हाम्रो ज्ञानको विषय पनि होइन । न्यायालयले जे निर्णय गर्छ, त्यही गर्छौँ । न्यायालयले दिएको निर्णय त मान्नैपर्‍यो नि !

कलाकारले पनि पैसा पाएका छैनौँ भन्ने फेरि तपाईंले पनि हामी घाटामा छौँ भन्नुहुन्छ त?

हैन हैन । उहाँहरुको कति पैसा बाँकी छ, ल्याएर आउन भन्नु न । कति पैसा बाँकी छ हेर्नुस् । हाम्रो खाता पल्टाउनुस् । दुई/चार दिन ढिलो चाँडो हुनु एउटा कुरा होला ।

यसअघि ‘मेरी बास्सै’ टिमले पनि यस्तै गुनासो गरेको थियो । तपाईंहरुमाथि सधै यस्ता गुनासा किन आउँछन् त?

त्यो बेलाको परिस्थिति नै फरक थियो । नाकाबन्दी थियो । लोडसेडिङ थियो । गाह्रो बेला थियो । त्यतिबेला हामी मात्र होइन, सिङ्गो देश समस्यामा थियो । व्यापार थिएन । राज्यलाई पैसा दिनैपर्थ्यो । प्रोडक्सनको पैसा दिनु नै पर्थ्यो । तर अहिले त्यस्तो छैन । त्यसबाट त पार लागेर आइसकियो नै हैन र?

भनेपछि तपाईंको समस्या कलाकारसँग नभएर जेपिटी क्रियशनसँग हो?

हो । हामीले कलाकारको सिर्जनामा त किन अंकुश लगाउने र? कलाकार सधै हामीसँग हुनुपर्छ भन्ने पनि हाम्रो राय होइन । बाबुछोरा त छुट्टिन्छन् भने कलाकार र प्रोडक्सन हाउस छुट्टिनु सामान्य हो । तर संस्थालाई नै मर्का पर्ने गरेर काम गर्न भएन । हामीले पात्र, बले, पाडें जिग्री जस्ता पात्र बनाएर पनि हामीले कार्यक्रम गर्न सक्थ्यौँ होला ।

उहाँहरुको सोच त्यस्तो छ । कलाकार हो भने त नयाँ सिर्जना गर्नुपर्‍यो नि भन्ने पनि हो । मदनकृष्ण (श्रेष्ठ) दाइ, सन्तोष (पन्त) दाइले पनि त सयौँ भूमिका गर्नुभयो नि । कलाकारले त समय र परिस्थिति अनुसार चेन्ज गर्नुपर्‍यो नि ।

भनेपछि तपाईंको भनाइ ‘भद्रगोल’ को ब्याज ‘सक्किगोनि’ ले खायो भन्ने हो?

अँ । व्यावसायिक रुपले हो । व्यावसायिक रुपले चलाउन भएन । एउटा कलाकारले व्यक्तिगत रुपमा काम गर्न पायो । तर हाम्रो कन्टेन्टलाई कपी गरेर हुबहु नगरिदिनुस् भन्ने मात्र हो ।

तर, उहाँहरुले त हामीले यी ‘चरित्र’ जन्माउन निकै मेहनत गरेका छौँ भन्नुहुन्छ नि?

कसले के गरेको छ, कसले कति गरेको छ भन्ने त छानबिनको विषय पनि होला नि । हैन र?

कमेन्ट गर्नुहोस्
Loading...